Anos – Brexa

16/06/202617/06/2026

Herbas de San Xoan 2026

O vindeiro sábado, 20 de xuño de 2026, faremos unha xornada adicada á popular tradición das herbas de San Xoan.

Durante esta xornada divulgativa falaremos das diferentes plantas que forman parte desta mestura tradicional, das súas propiedades e usos, así como dos rituais e crenzas asociados á noite máis máxica do ano en Galicia. A través da observación e da conversa, chegarémonos a un saber popular que combina natureza, cultura e identidade.

A actividade farémola en colaboración co Grupo Naturalista Habitat que nos aportan os expertos que nos guiaran no coñecemento desta plantas.

Nesta actividade NON recolleremos herbas, senón que aprenderemos a identificalas no seu medio natural, respectando os espazos e promovendo unha relación sostible coa contorna.

A actividade é gratuita e hai 20 prazas dispoñibles que se asignarán por orden de inscripción. A reserva será efectiva cando recibas confirmación no teu correo electrónico.

Se necesitas máis información escribe ao correo brexa.asociacion@gmail.com ou chama ao teléfono 698146685.

Enlace ao formulario de inscripción

09/06/202609/06/2026

Actividade cos alumnos do Colexio de Carral

Os alumnos de 6º ano de infantil do colexio de Carral realizaron unha plantación de árbores no parque dos Capelos o pasado día 5 de xuño. A actividade foi organizada pola nosa asociación, o colexio Vicente Otero de Carral e o concello de Carral.

Participaron 29 nenos e nenas que traballaron con gran entusiasmo e lograron plantar 30 acivros e 10 pradairos, superando as nosas previsións.

Os nenos e nenas gozaron dunha mañá ao aire libre ademaís de plantar, regar, fertilizar e colocar protectores ás plantas.

Con esta plantación aumentamos a superficie arborada da parcela e a tamén a variedade de especies o que nos acerca ao obxectivo de crear un parque natural no corazón do polígono dos Capelos..

Os alumnos estiveron acompañados por 3 profesores, dous voluntarios da Brexa e a técnica de medio ambiente do concello. O concello desprazou o vehículo cisterna de protección civil o que nos permitiu regar xenerosamente as prantas.

Tamén recibimos a visita do alcalde José Luis Mouriño e o concelleiro de Urbanismo e Medio Ambiente Óscar Bodelo.

16/04/202617/04/2026

Andaina de presentación do proxecto do Feal

Para o día 2 de maio organizamos unha andaina para presentar o proxecto de O Feal. Faremos unha ruta circular que terá o punto de partida no Polígono Industrial de Os Capelos (Tabeaio, Carral). Seguiremos pola beira do río Brexa e polo Camiño Inglés ata chegar a O Feal, na ribeira do río Barcés, onde faremos unha parada para visitar a parcela. Continuaremos ata Sarandóns e volveremos ao punto de partida.

O percorrido total é de 7 km de dificultade moderada. Os soci@s non teñen que pagar a inscrición pero é necesario confirmar asistencia.

Acceso ao formulario de inscrición.

Día : sábado, 2 de maio 2026
Punto de encontro: Polígono dos Capelos
Hora: 10:00
Contacto :
- tlfn: 667 025 903
- email: brexa.asociacion@gmail.com
Algunhas recomendacións para a andaina

15/04/202616/04/2026

Coidado de Castiñeiros en Bruma

Recentemente tivemos unha conversa co párroco da parroquia de Santa Mariña de Veira que nos expresou a súa preocupación sobre o estado de saúde duns castiñeiros centenarios que forman parte do adro da capela de San Lourenzo de Bruma.

Dous socios, Xan e Ricardo, desprazáronse ao lugar e comprobaron que as árbores estaban infectadas con chancro, unha enfermidade que afecta gravemente aos castiñeiros.

Decidimos organizar unha intervención o día 5 de Abril para mellorar o seu estado. Fixeron unha poda de chupóns e aplicaron pasta cicatrizante para a rexeneración de feridas causadas polas podas.

Infelizmente o chancro secou definitivamente un dos vellos exemplares que formaba parte deste singular grupo de árbores.

Rematado o traballo conversaron cos veciñ@s aos que lles agradecemos a axuda recibida. Tamén tiveron a ocasión de dar un agradable paseo acompañando @s pregrin@s que frecuentan esa zona.

Agardemos que estos coidados sirvan para alongar a vida a estas vellas testemuñas do camiño

10/04/202610/04/2026

O CEIP de Tabeaio celebra o Día da Árbore

O alumnado do CEIP de Tabeaio celebrou o día 23 de marzo o Día da Árbore cunha actividade organizada coa colaboración da Asociación Brexa e o Concello de Carral.

Participaron 19 nenas e nenos de 3 a 6 anos de idade, acompañados pola súas profesoras, que se desplazaron en autobús ao Parque dos Capelos . Alí plantaron un total de 15 cerdeiras de variedades autóctonas nunha zona na que, en cursos anteriores, xa se fixeran actividades semellantes cos alumnos do IES de Carral.

Despois da plantación participaron nunha actividade sobre polinizadores e sobre o ciclo das bolboretas . A continuación fixeron unha visita ao rio Brexo na zona do Muíño do Quenllo.

O alcalde, José Luís Fernández, e a técnica de Medio Ambiente, María Couto, xunto con outros traballadores do concello estiveron presentes ou colaboraron na actividade.

12/03/202613/03/2026

Acordo de custodia de O Feal

Recentemente asinamos un acordo de custodia dunha parcela, coñecida como o Feal, situada no lugar do Monte, parroquia de Cañás (concello de Carral).

A súa superficie é de 14000 m² e está moi próxima ao río Barcés. Ten unha parte baixa moi húmida que está poboada por salgueiros e ameneiros. Na parte alta ten unha plantación de piñeiros e hai outras zonas de árbores froiteiras e de pradeira. Existen dúas edificacións de pedra, unha bodega semienterrada na que comprobamos que habitan morcegos e un estanque que almacena auga que continua por un rego que percorre a parcela.

No acordo de custodia establecimos que o obxectivo é manter e mellorar os valores naturais da parcela por medio da rexeneración natural da vexetación e da fauna. Nas últimas semanas tivemos varias xornadas de traballo con voluntarios para localizar exemplares de carballo que protexer para a creación dunha carballeira na zona máis alta da parcela.

Queremos agradecer á familia que asinou o acordo esta oportunidade para preservar unha zona cuns valores naturais moi importantes e que pode servir de modelo para outras parcelas en situación semellante.

24/01/202624/01/2026

Acordo de colaboración coa Asociación Down Coruña

A Asociación Down Coruña ten como finalidade principal a realización de actividades que melloren a calidade de vida das persoas con Síndrome de Down e outras discapacidades intelectuais por medio da súa inclusión social.

Entre outros desenvolve programas relacionados coa conservación ambiental polo que ambas entidades decidimos asinar un acordo de colaboración para a realización de actividades de voluntariado na que participen os seus asociados.

Tivemos unha primeira xornada para coñecer o noso proxecto dos Muíños do Casal e Bordón. Nunha segunda xornada retiraron polas do camiño que vai do Centro Social de Ans ata o río Barcés e tamén retiramos tradescantia na canle do Muíño do Casal.

Nas actividades participaron cinco persoas usuarias do programa acompañadas de Cristina Simón e Francisco Illanes como profesional de apoio e responsable do programa respectivamente. Os dous valoraron positivamente a actividade en relación á mellora da mobilidade nun terreo con relativa difucultade.

O traballo que fixeron tivo un impacto apreciable na mellora do camiño que forma parte do Roteiro do Muíño do Casal que elaboramos recentemente, e avanzamos na eliminación de especies invasoras na zona.

Nas seguintes xornadas temos previstas outras actividades como a colocación de caixas niño, identificación de especies animais e elaboración dunha guía fotográfica dos valores da área,

13/01/202624/01/2026

Roteiro do Muíño do Casal

Creamos unha conta en Wikiloc para difundir roteiros que teñan relación coa zonas que estamos custodiando.

O primeiro que subimos ten o título do Muíño do Casal. É un roteiro circular que empeza no Centro Social de Ans e continúa por un camiño recuperado recentemente grazas á colaboración do Concello de Carral.

Este camiño leva ao río Barcés onde estamos desenvolvendo o proxecto dos Muíños do Casal e do Bordón. Aí continúa pola antiga canle do Muíño do Casal ata a ponte vella, cerca de Ardexurxo. O regreso faise polo Monte do Casal ata chegar novamente ao Centro Social.

Rogamos respetade as normas comúns de calquer espazo natural, e agardamos que disfrutedes do roteiro. Se estades interesad@s en saber algo mais ou facer visitas guiadas podedes contactar con nós.

15/12/202512/03/2026

Unha nova parcela en propiedade

O pasado 6 de novembro asinamos a compra duna parcela de 4100 m²de superficie situada na beira do Barcés que pasa a formar do proxecto dos Muíños do Casal e do Bordón.

A parcela coñecida como a leira de A Codeseira ten sobre todo freixos e bidueiros. Tamén hai algún eucalipto e algunhas plantas de Herba Tintureira (Phytolacca Americana) que empezaremos a eliminar ao longo do próximo ano.

Linda coa parcela Prado do Casal, que escrituraramos no ano 2024, e coa parcela na que está o Muíño do Casal sobre a que temos un acordo de custodia. Moi próximas están as parcelas do Prado da Poza e da Argañana que mercarámos nos anos 2023 e 2024.

En total temos uns 8500 m² en propiedade que van ser a base do proxecto de Área Natural dos Muíños do Casal e do Bordón que pretendemos desenvolver nos próximos anos.Ademáis temos un acordo de custodia a longo prazo con outras parcelas lindantes por uha superficie de 1 ha.

A Deputación de A Coruña concedeunos unha axuda que representa o 60 % dos gastos de compra da parcela. O concello de Carral aporta o 22 % e o resto procede das cotas e de doazóns.

21/03/202502/04/2025

Documental Filtrando a Luz

O día 20 de marzo proxectamos o documental Filtrando a Luz do director Xacobe Meléndrez Fassbender. Organizamos o acto en colaboración do Concello de Carral dentro do 4º Ciclo de Cine Documental Galego.
Este documental elaborado co material do Proxecto Raices promovido pola Federación Ecoloxísta Galega que recolle a historia do movemento ecoloxista galego dos últmos 60 anos, contada polos seus protagonistas.
Ao rematar a proxección houbo un coloquio do director co público asistente sobre o documental e tamén sobre a actualidade do ecoloxísmo en Galiza.