bordón

16/04/202617/04/2026

Andaina de presentación do proxecto do Feal

Para o día 2 de maio organizamos unha andaina para presentar o proxecto de O Feal. Faremos unha ruta circular que terá o punto de partida no Polígono Industrial de Os Capelos (Tabeaio, Carral). Seguiremos pola beira do río Brexa e polo Camiño Inglés ata chegar a O Feal, na ribeira do río Barcés, onde faremos unha parada para visitar a parcela. Continuaremos ata Sarandóns e volveremos ao punto de partida.

O percorrido total é de 7 km de dificultade moderada. Os soci@s non teñen que pagar a inscrición pero é necesario confirmar asistencia.

Acceso ao formulario de inscrición.

Día : sábado, 2 de maio 2026
Punto de encontro: Polígono dos Capelos
Hora: 10:00
Contacto :
- tlfn: 667 025 903
- email: brexa.asociacion@gmail.com
Algunhas recomendacións para a andaina

15/04/202616/04/2026

Coidado de Castiñeiros en Bruma

Recentemente tivemos unha conversa co párroco da parroquia de Santa Mariña de Veira que nos expresou a súa preocupación sobre o estado de saúde duns castiñeiros centenarios que forman parte do adro da capela de San Lourenzo de Bruma.

Dous socios, Xan e Ricardo, desprazáronse ao lugar e comprobaron que as árbores estaban infectadas con chancro, unha enfermidade que afecta gravemente aos castiñeiros.

Decidimos organizar unha intervención o día 5 de Abril para mellorar o seu estado. Fixeron unha poda de chupóns e aplicaron pasta cicatrizante para a rexeneración de feridas causadas polas podas.

Infelizmente o chancro secou definitivamente un dos vellos exemplares que formaba parte deste singular grupo de árbores.

Rematado o traballo conversaron cos veciñ@s aos que lles agradecemos a axuda recibida. Tamén tiveron a ocasión de dar un agradable paseo acompañando @s pregrin@s que frecuentan esa zona.

Agardemos que estos coidados sirvan para alongar a vida a estas vellas testemuñas do camiño

10/04/202610/04/2026

O CEIP de Tabeaio celebra o Día da Árbore

O alumnado do CEIP de Tabeaio celebrou o día 23 de marzo o Día da Árbore cunha actividade organizada coa colaboración da Asociación Brexa e o Concello de Carral.

Participaron 19 nenas e nenos de 3 a 6 anos de idade, acompañados pola súas profesoras, que se desplazaron en autobús ao Parque dos Capelos . Alí plantaron un total de 15 cerdeiras de variedades autóctonas nunha zona na que, en cursos anteriores, xa se fixeran actividades semellantes cos alumnos do IES de Carral.

Despois da plantación participaron nunha actividade sobre polinizadores e sobre o ciclo das bolboretas . A continuación fixeron unha visita ao rio Brexo na zona do Muíño do Quenllo.

O alcalde, José Luís Fernández, e a técnica de Medio Ambiente, María Couto, xunto con outros traballadores do concello estiveron presentes ou colaboraron na actividade.

12/03/202613/03/2026

Acordo de custodia de O Feal

Recentemente asinamos un acordo de custodia dunha parcela, coñecida como o Feal, situada no lugar do Monte, parroquia de Cañás (concello de Carral).

A súa superficie é de 14000 m² e está moi próxima ao río Barcés. Ten unha parte baixa moi húmida que está poboada por salgueiros e ameneiros. Na parte alta ten unha plantación de piñeiros e hai outras zonas de árbores froiteiras e de pradeira. Existen dúas edificacións de pedra, unha bodega semienterrada na que comprobamos que habitan morcegos e un estanque que almacena auga que continua por un rego que percorre a parcela.

No acordo de custodia establecimos que o obxectivo é manter e mellorar os valores naturais da parcela por medio da rexeneración natural da vexetación e da fauna. Nas últimas semanas tivemos varias xornadas de traballo con voluntarios para localizar exemplares de carballo que protexer para a creación dunha carballeira na zona máis alta da parcela.

Queremos agradecer á familia que asinou o acordo esta oportunidade para preservar unha zona cuns valores naturais moi importantes e que pode servir de modelo para outras parcelas en situación semellante.

24/01/202624/01/2026

Acordo de colaboración coa Asociación Down Coruña

A Asociación Down Coruña ten como finalidade principal a realización de actividades que melloren a calidade de vida das persoas con Síndrome de Down e outras discapacidades intelectuais por medio da súa inclusión social.

Entre outros desenvolve programas relacionados coa conservación ambiental polo que ambas entidades decidimos asinar un acordo de colaboración para a realización de actividades de voluntariado na que participen os seus asociados.

Tivemos unha primeira xornada para coñecer o noso proxecto dos Muíños do Casal e Bordón. Nunha segunda xornada retiraron polas do camiño que vai do Centro Social de Ans ata o río Barcés e tamén retiramos tradescantia na canle do Muíño do Casal.

Nas actividades participaron cinco persoas usuarias do programa acompañadas de Cristina Simón e Francisco Illanes como profesional de apoio e responsable do programa respectivamente. Os dous valoraron positivamente a actividade en relación á mellora da mobilidade nun terreo con relativa difucultade.

O traballo que fixeron tivo un impacto apreciable na mellora do camiño que forma parte do Roteiro do Muíño do Casal que elaboramos recentemente, e avanzamos na eliminación de especies invasoras na zona.

Nas seguintes xornadas temos previstas outras actividades como a colocación de caixas niño, identificación de especies animais e elaboración dunha guía fotográfica dos valores da área,

13/01/202624/01/2026

Roteiro do Muíño do Casal

Creamos unha conta en Wikiloc para difundir roteiros que teñan relación coa zonas que estamos custodiando.

O primeiro que subimos ten o título do Muíño do Casal. É un roteiro circular que empeza no Centro Social de Ans e continúa por un camiño recuperado recentemente grazas á colaboración do Concello de Carral.

Este camiño leva ao río Barcés onde estamos desenvolvendo o proxecto dos Muíños do Casal e do Bordón. Aí continúa pola antiga canle do Muíño do Casal ata a ponte vella, cerca de Ardexurxo. O regreso faise polo Monte do Casal ata chegar novamente ao Centro Social.

Rogamos respetade as normas comúns de calquer espazo natural, e agardamos que disfrutedes do roteiro. Se estades interesad@s en saber algo mais ou facer visitas guiadas podedes contactar con nós.

15/12/202512/03/2026

Unha nova parcela en propiedade

O pasado 6 de novembro asinamos a compra duna parcela de 4100 m²de superficie situada na beira do Barcés que pasa a formar do proxecto dos Muíños do Casal e do Bordón.

A parcela coñecida como a leira de A Codeseira ten sobre todo freixos e bidueiros. Tamén hai algún eucalipto e algunhas plantas de Herba Tintureira (Phytolacca Americana) que empezaremos a eliminar ao longo do próximo ano.

Linda coa parcela Prado do Casal, que escrituraramos no ano 2024, e coa parcela na que está o Muíño do Casal sobre a que temos un acordo de custodia. Moi próximas están as parcelas do Prado da Poza e da Argañana que mercarámos nos anos 2023 e 2024.

En total temos uns 8500 m² en propiedade que van ser a base do proxecto de Área Natural dos Muíños do Casal e do Bordón que pretendemos desenvolver nos próximos anos.Ademáis temos un acordo de custodia a longo prazo con outras parcelas lindantes por uha superficie de 1 ha.

A Deputación de A Coruña concedeunos unha axuda que representa o 60 % dos gastos de compra da parcela. O concello de Carral aporta o 22 % e o resto procede das cotas e de doazóns.

25/03/202425/03/2024

Celebración do día da árbore no IES de Carral

O día 22 deste mes celebramos o Día da Árbore cos alumnos do IES de Carral en colaboración co Concello de Carral. Participaron 50 alumnos de 3º de ESO nunha actividade que consistiu en plantar árbores e arbustos na parcela que o concello ten na zona do Quenllo na marxe do río Brexo.

É o terceiro ano consecutivo que facemos unha actividade deste tipo conxuntamente co IES de Carral. Este ano plantamos freixos, acivros, biuteiros, espiño albar, abeleiras e ruscos.

As árbores foron doadas polos socios e participantes do proxecto Viveiro en Rede que iniciamos o ano anterior. Son plantas procedentes de sementes e estacas obtidas en zonas próximas. Os espiños albar foron doados por Fragas do Mandeo.

Na semana previa á plantación os exemplares seleccionados estiveron expostas no centro e alumnos de 1º de ESO realizaron actividades de recoñecemento de plantas.

Membros de Protección Civil do Concello e o concelleiro de Participación Cidadá acompañaron aos alumnos nos seu desprazamento ata o lugar da plantación. Tamén contamos coa presenza e colaboración do alcalde, da concelleira de Educación e da concelleira de Medio Ambiente.

Con esta plantación aumentamos a diversidade e número de especies nunha zona da parcela na que levamos actuando desde o ano 2019.

Agradecemos ao profesorado e, especialmente, aos alumnos o entusiasmo e cariño con que participaron nesta actividade que esperamos continuar facendo nos seguintes anos.

07/11/202307/11/2023

Convenio de colaboración coa UDC

Recentemente asinamos un convenio coa Universidade da Coruña para que o alumnado poida facer proxectos de aprendizaxe colaborando coa nosa asociación.

A idea é que ademais dos obxectivos académicos os traballos realizados supoñan un servizo á comunidade.

Xa temos 7 alumas e alumnos, da Facultade de Bioloxía, en dous grupos de traballo que traballarán en proxectos relacionados coa etoloxía das especies que habitan a ribeiras do río Brexa e Barcés. Polo de agora xa viñeron coñecer o noso proxecto e visitar algunha das parcelas que xestionamos.

Queremos agradecerlle á UDC que contara con nos para este proxecto e desexámoslle moito éxito aos participantes.

24/09/202326/09/2023

Limpeza simultánea de ríos 2023

Por 6º ano consecutivo participamos na convocatoria de Limpeza Simultánea de Ríos organizada polo proxecto Ríos. Coa colaboración de 22 voluntarios limpamos unha zona do río Barcés situada na parroquia de Sumio (Carral) cerca do comezo da estrada á Cabra.

Actuamos ao longo duns 500 m e retiramos uns 250 kg de residuos de diferente tipo, entre eles 16 neumáticos, restos de neveiras, vidros, etc.

O concello de Carral colaborou poñendo á nosa disposición 2 contedores de lixo e coa recollida do lixo e transporte ao punto limpo.

Damos a grazas aos voluntarios e ao concello pola súa colaboración.

Colaboran:

Galería de imaxes

Continuar lendo